每次講開《十年》，
我都一定會講《本地蛋》，
係眾多故事最好最好嘅一個。
—
浪擲嘅唔只係雞蛋，
仲有下一代嘅生命。
—
六個少年軍一字排開列陣，向藏有禁書嘅「小林書舍」投擲雞蛋，森叔（廖啟智飾）見狀喝止，少年軍四散，書店老闆開門，連埋森叔同佢嘅兒子明仔（少年軍之一）離開。
—
書店老闆：「森叔，明仔一收到咩指引啊，名單啊，都會比我架。」
—
書店老闆打開一個住屋單位嘅門，屋入面有大量藏書，唔少年青人都喺度靜靜閱讀。
—
書店老闆：「同啲熟客夾錢租咗哩度，專放一啲唔俾擺出嚟嘅嘢，咁大家就愈儲愈多，愈儲愈多，啲書仲多過舖面，都係明仔一早通知我，話佢哋會嚟丟嘢，我先落咗閘，由佢哋囉。」
—
書店老闆繼續講：「其實未有少年軍嗰陣咪都係咁架，嗰陣仲有啲大人嚟搞事添，都慣曬喇。」
-
森叔：「千祈唔好慣曬啊，就係我哋幾代人慣曬，你哋先至會咁樣。」
—
故事名叫《本地蛋》，我哋都明白點解係「本地」，但點解會係「蛋」，而唔係「薑」？唔係「豬」？或者係「雞」？「蛋」，從來都係生活之源，背後象徵嘅，係一個個年青嘅生命。
—
五位少年軍向書店丟蛋，蛋漿、蛋殼破碎一地，而明仔就只係識企喺原地呆若木雞，睇住身邊嘅少年軍執行上級嘅指令，佢同爸爸講：「唔嚟又唔得，都唔知可以點。」盲目地人云亦云，被愚民被洗腦，失去咗獨立思考嘅能力，唔識再用腦去思考，香港失去嘅，唔止係本地蛋，而係一整代嘅人。
—
保護本地蛋，亦即係保護本地嘅下一代。成日講「救救孩子」，好似太過矯情，但有啲下一代真係會因為灰暗嘅未來而離同路人而去，而仲在生嘅，亦難免會成為無獨立思考嘅行屍，救下一代，亦即係救香港。
—
2025年，香港最後一間活雞農場結業，取而代之嘅就係香港人從此以後都要食大陸嘅假雞蛋，「聽話又死，唔聽話」又死，雞場明明已經遷就曬政府嘅政策安排，但最終亦避唔過被扣上「借農場反政府」嘅帽子，我退敵進，彼盈我竭。
-
「千祈唔好慣曬啊，就係我哋幾代人慣曬，你哋先至會咁樣。」「咪係，《叮噹》都禁，傻架？」
Search